Shu o‘rinda jazoni ijro etish tizimida amalga oshirilgan islohotlar va ularning natijalari haqida to‘xtalib o‘tishni joiz deb bildik.
Ma’lumki, O‘zbekiston Respublikasi Prezidentining 2017-yil 10-apreldagi PF-5005-son “Ichki ishlar organlarining faoliyati samaradorligini tubdan oshirish, jamoat tartibini, fuqarolar huquqlari, erkinliklari va qonuniy manfaatlarini ishonchli himoya qilishni ta’minlashda ularning mas’uliyatini kuchaytirish chora-tadbirlari to‘g‘risida”gi farmoni jazoni ijro etish tizimini isloh qilishning yangi bosqichini belgilab berdi.
Ushbu normativ-huquqiy hujjatga asosan ichki ishlar organlarining ozodlikdan mahrum etish bilan bog‘liq bo‘lgan jazolarni ijro etish sohasidagi faoliyatini takomillashtirishning asosiy yo‘nalishlari belgilab berildi. Unga asosan:
- Birinchidan, mahkumlar va qamoqqa olingan shaxslarning huquqlariga so‘zsiz rioya etilishini, ularning sha’ni va qadr-qimmati hurmat qilinishini ta’minlash, xodimlarning xizmat vazifalarini lozim darajada bajarishlari ustidan nazoratni korrupsiya va mansab vakolatini suiiste’mol qilish holatlarini istisno etadigan tarzda kuchaytirish.
- Ikkinchidan, mahkumlarda qonun talablariga va jamiyatdagi xulq-atvor qoidalariga rioya etish madaniyatini, bilim va ma’naviy-axloqiy saviyasini oshirishga intilishni shakllantirishga qaratilgan qayta tarbiyalash va axloqan tuzatish jarayonini takomillashtirish.
- Uchinchidan, fuqarolar bilan ularni jinoiy-ijroiya sohasida tashvishga solayotgan muammolarni hal etishda samarali muloqot o‘rnatish, jazoni ijro etish muassasasidan ozod etilgan shaxslarning ijtimoiy moslashuvini amalga oshirishda fuqarolik jamiyati institutlari bilan uzviy hamkorlikni ta’minlash.